Un total de 23 investigadores e investigadoras da Universidade da Coruña (UDC) figuran entre os científicos máis influentes do mundo, segundo a clasificación de Stanford.

Así o informa a UDC en relación a unha clasificación que analiza persoal investigador de todo o mundo a través dunha base de datos que ordena en campos e subcampos científicos.

Esta lista xera dúas clasificacións. A primeira inclúe toda a traxectoria da persoa investigadora e a segunda está referida ao último ano dos resultados.

Na primeira delas, a que inclúe toda a traxectoria, a UDC conta con 15 investigadores e investigadoras, onde as disciplinas que contan con maior representación son Química e Medicina Clínica. En canto ao que ten en conta as citas recibidas, son 17 as persoas incluídas. En total, das 23 persoas vinculadas á UDC, 11 son mulleres, o que representa o 47,8% do total.