Orgullo sente a veciñanza coruñesa cando ve novas coma esta. Ver como 15 voluntarios e voluntarias da cidade empregan o seu tempo para coidar a persoas doutro lado do mundo é ben reconfortante.
Repetindo a experiencia do ano pasado, o voluntariado da ONG Ecodesarrollo Gaia estivo durante dúas semanas despazados localidade senegalesa de Yoff-Tonghor. Dende o 26 de outubro ata o 10 de novembro puideron prestar atención médico-farmacéutica a uns 3.000 pacientes que carecen de recursos económicos para acceder á asistencia sanitaria en Senegal.
Todo, no marco do proxecto Coruña Cura, un programa que se integra no plan global de desenvolvemento local sostible da ONG, a través do cal se aborda o aspecto hixiénico-sanitario desta localidade senegalesa e se fomenta a cooperación norte-sur.
Este ano é o 13º que Ecodesarrollo Gaia leva a cabo o proxecto, que se desenvolve na Escola Coruña que a ONG ten na localidade senegalesa, cuxo mantemento e actividade está financiado pola Deputación da Coruña.
Dos preto de 3.000 pacientes que recibiron atención, os problemas máis frecuentes foron lesións dermatolóxicas, infeccións respiratorias, asma, feridas e úlceras con mala evolución, parasitos intestinais, sarna ou tiña. Tamén se realizan controis de enfermidades crónicas na poboación (principalmente hipertensión e diabetes), controis de saúde pediátrico, probas de malaria e algunhas intervencións menores.
Ademais da asistencia médica, os cooperantes tamén facilitaron a esta poboación material de enfermería e medicamentos, entre eles analxésicos, antifúngicos, antibióticos, material de apósito, etc. Ecodesarrollo Gaia confía na xenerosidade das farmacias e hospitais que doan medicamentos para este proxecto, así como nas achegas económicas de particulares que facilitan o desenvolvemento do programa.
Durante a súa estadía en Senegal, os voluntarios tamén realizaron actividades de educación sanitaria e promoción da saúde para dirixentes locais, profesores e poboación en xeral. Neles explicáronse temas básicos como a importancia da hixiene ou a forma adecuada de limparse, e impartéronse nocións de pediatría, primeiros auxilios, nutrición, etc. Así mesmo, realizáronse visitas domiciliarias a persoas encamadas.Ágrica
Máis novas
