A rede de Xornais de Galicia Confidencial, entre eles este Xornal da Coruña, seguindo a estela doutras publicacións xornalísticas como The Guardian ou La Vanguardia, deixa a rede X, antes Twitter.
Así, o Xornal da Coruña deixará de publicar chíos de forma directa na rede social X e deixará en suspenso as súas contas, xa que desde a chegada do magnate Elon Musk, esta rede é un altofalante das teorías da conspiración, de noticias falsas e unha plataforma claramente virada a posicións populistas, racistas e vinculadas á ultradereita.
A decisión coincide co anuncio de Donald Trump de nomear a Elon Musk como asesor para un Departamento de Eficiencia do Goberno (DOGE), co obxectivo de facer recortes na administración estadounidense, é incompatible con que dirixa unha rede social da magnitude de X. Ese nomeamento político situa a Musk ao carón dos que defenden deportacións masivas e despidos de funcionarios que non son afins as teorías conspiranoicas do futuro presidente.
O diario segue compartindo historias na rede Instagram (@xornaldacoruna) e Facebook (@Xornal da Coruña).
