Este sábado 16 de novembro, a partir das 12:00 horas, desenvolverase o roteiro literario “Música nas palabras. Luísa Villalta”. Guiado por María Canosa, fará, partindo da Praza da Tolerancia, un pequeno percorrido vital da figura de Luísa, mesturado con lecturas de textos: teatrais, poéticos, narrativos, de opinión e tamén biográficos.

Ao longo de todo o paseo, a escritora ceense afincada na Coruña, debullará a ollada de Luísa sobre o mundo, e a guía que a música ofreceu á súa vida.

As persoas interesadas poden inscribirse previamente enviando un correo electrónico a oficina@aelg.org indicando o nome e apelidos, así como o nome do roteiro. En todo caso, non é obrigatoria a inscrición, polo que pode achegarse calquera persoa se así o desexa.

A actividade conta co apoio do Concello da Coruña.