O pleno da Coruña, celebrado este luns, aprobou, nunha sesión extraordinaria, unha unha addenda ao convenio asinado entre o Concello e a Xunta para a construción do ‘Novo Chuac’.

No devandito convenio, precisa o goberno local, o Concello “comprometíase a achegar 22,2 millóns de euros para as obras dos accesos, encargándose a Xunta da licitación e execución dos devanditos traballos e establecendo as anualidades de pago”.

O goberno local vincula esta addenda “cos atrasos que a obra acumula” e por mor dunha solicitude da Xunta “dunha modificación do convenio estendendo as anualidades previstas un exercicio máis”.

O portavoz do goberno municipal, José Manuel Lage, mostrouse moi crítico coa Xunta. “Non imos tolerar nin un atraso máis nas obras do ‘Novo Chuac’, aseverou na sesión plenaria.

Segundo o novo calendario de pagos, o Concello achegará agora 547.681 euros no 2024, cinco millóns no 2025, 9,9 millóns no 2026 e 10 millóns no 2027, “cando no convenio orixinal as obras ían terminar no 2026”, incide o consistorio nun comunicado tras a sesión plenaria.

Ademais, o pleno celebrado hoxe tamén aprobou a modificación de tres ordenanzas fiscais. Lage Tuñas lembrou que o goberno local xa adiantara a conxelación das taxas e tributos para o ano 2025.