As obras de remodelación da avenida Alfonso Molina, na cidade da Coruña, que realiza o Ministerio de Transportes, provocarán o corte do ramal de saída a AC-11 cara á AP-9/Palavea, no quilómetro 2,710.
Segundo explica o Ministerio de Transportes nun comunicado, no avance dos traballos precísase realizar unha gabia para aloxar o prisma de telecomunicacións baixo o ramal que conecta a AC-11 coa AP-9.
Por iso, o peche do ramal comezará ás 9,30 horas do martes para o seu restablecemento ao final da xornada, cunha protección da gabia realizada. Haberá un itinerario alternativo debidamente sinalizado. O orzamento vixente global destas obras na avenida Alfonso Molina é de 18,3 millóns de euros, IVE incluído.
