A asociación LGTBI+ Alas Coruña, entidade que exerce a acusación popular no caso do asasinato de Samuel Luiz, manifestou a súa “satisfacción” tras coñecerse o veredicto do xurado, que entende que un dos acusados –Diego M.M.– actuou con “animadversión” pola orientación sexual da vítima.
Nunha nota de prensa, a entidade dá por cumprido o obxectivo que se marcou cando decidiu ser parte deste proceso xudicial, “clave para a defensa dos dereitos da comunidade LGTBI+”.
Ao longo de toda a vista oral, lembra, as argumentacións realizadas por parte do letrado de Alas Coruña, Mario Pozzo-Citro, centráronse en probar como a Samuel se lle leu a “pluma”, feito que provocou que “fose visto como unha vítima fácil”, así como a importancia do berro de “maricón de merda” que o acusado proferiu en diferentes momentos.
Agora, unha vez emitido o veredicto, a entidade valora “positivamente” o resultado deste proceso xudicial, pendente aínda de coñecer as penas para cada un dos responsables deste asasinato.
“Alas Coruña confía en que este caso sirva para visibilizar a importancia de denunciar e axude a restaurar a confianza no sistema xudicial das persoas que sufriron LGTBIfobia, unha confianza que tal e como se recolle nos informes que elabora anualmente desde 2017 a través do seu servizo, o Observatorio coruñés contra a LGTBIfobia, viuse mermada”, conclúe.
O xurado do xuízo pola malleira mortal a Samuel Luiz declarou culpable de asasinato a tres do cinco novos xulgados por estes feitos, ocorridos na madrugada do 3 de xullo de 2021 no paseo marítimo coruñés, e como cómplice a outro dos acusados mentres que absolveu á única muller xulgada.
Tres acusados de asasinato, un por cómplice e a moza, absolta, no xuízo de Samuel Luiz
As defensas dos acusados do asasinato de Samuel anuncian recursos
