Un mozo, de 18 anos, perdeu a vida en Arteixo tras saírse da vía co seu vehículo e chocar contra un poste de formigón. Segundo informou a Garda Civil, o suceso produciuse sobre as 14.45 horas deste xoves na estrada CM-0398, no punto quilométrico 2,800. Ata o punto desprazáronse os Bombeiros de Arteixo, a Policía Local, a Garda Civil, os profesionais de Urxencias Sanitarias de Galicia-061 e Protección Civil de Arteixo.
Precisamente os bombeiros tiveron que facer uso do material de excarceración para liberar ao home, por cuxa vida nada puideron facer os profesionais sanitarios. Foron varios os particulares os que alertaron aos servizos de emerxencias, indicando que a situación era grave e que a persoa estaba atrapada. Con todo, unha vez no lugar, os sanitarios non puideron salvar a vida do novo, a pesar de que se desprazou ata alí unha ambulancia de soporte vital avanzado e outra de soporte vital básico.
