O comité de empresa da UTE Acceso Porto Exterior A Coruña convocou dous días de folga nas obras de construción dos túneles que darán acceso ferroviario a Punta Lagosteira, pola “imposibilidade” de chegar a un acordo coa empresa en materia de vacacións, retribucións, retencións e condicións de seguridade nos traballos. Segundo informou a CIG, o “descontento” entre o persoal polas condicións dáse desde o inicio das obras a principios de 2023 e o pasado 10 de outubro “conseguiron forzar” o inicio de negociacións.

O secretario comarcal da FCM-CIG, Marío Maceiras, sinalou que “máis aló das boas palabras”, á porta do mes de decembro, os traballadores “seguen sen coñecer” cando gozarán das vacacións anuais “nin como llas retribuirán”. Por iso, o comité de empresa convocou dúas xornadas de folga de 24 horas. A primeira o martes, día 3, desde as 07.00 horas ata as 07.00 horas do mércores, e o segundo o xoves, no mesmo horario.