A Comisión pola Recuperación da Memoria Histórica da Coruña demandou un acordo entre administracións, institucións e grupos políticos para instar ao Estado a que non interpoña un recurso de apelación contra a sentenza dun xulgado coruñés que eximiu ao Concello de abonar máis de 15 millóns de euros á Sociedade de Infraestruturas e Equipamentos Penais e da Seguridade do Estado (Siepse) pola cesión desta infraestrutura, declarando nulo o convenio de permuta do 2005.

Segundo esta Comisión, a firmeza da devandita sentenza posibilitaría un convenio para a cesión gratuíta do edificio e os terreos da antiga prisión, así como o financiamento estatal para a súa rehabilitación e posta en valor. Nun comunicado, reivindicou que, de confirmarse, a sentenza evitaría “un manifesto enriquecemento inxusto do Estado, dado que o convenio do 2005 obrigaría a abonar un gran desembolso económico ao Concello por un edificio construído en terreos que foron cedidos en 1925 para uso de prisión, sen que o Estado procedese á súa devolución gratuíta, unha vez desafectados no 2009”. “Unha reversión gratuíta que si efectuou o Estado noutras prisións, como os casos de Zamora ou de Granada”, engadiu.