A programación do Nadal do Concello da Coruña comezará este xoves, día 5, co acto de aceso das luces na praza de María Pita e estenderase durante un mes, ata a cabalgata de Reis Meigos, con actividades “por todos os barrios” e “para todas as idades”. Así o anunciou a alcaldesa herculina, Inés Rey, durante a súa presentación, na que recalcou que a cidade contará con “3,6 millóns de luces de Nadal, 300.000 máis que hai un ano”. “Tamén aumentan os arcos ata os 555, os farois pasan de 198 a 383, as árbores pasan de 53 do ano pasado a 80 e sumaranse case 40 rúas máis iluminadas”, incidiu.
Durante a presentación, a rexedora, que estivo acompañada do concelleiro de Cultura e Turismo, Gonzalo Castro, fixo público o cartel e a imaxe gráfica deste ano, obra da artista coruñesa Bea Lema, Premio Nacional do Cómic 2024. Respecto ao acto de aceso das luces, explicou que terá lugar na praza de María Pita ás 19.30 horas e contará con animación a cargo de Peter Punk.”Despois, actuarán Os Alcántara”, indicou. Rey dixo, ademais, que, entre outras actividades, haberá atraccións nos xardíns de Méndez Núñez, así como a primeira Feira Artesá do Nadal, do 20 de decembro ao 5 de xaneiro. “Con espectáculos para todas as idades nos diferentes recintos culturais da cidade”, destacou. Tamén se desenvolverá o oitavo Galicia Magic Fest, que terá lugar no Teatro Colón os días 2 e 3 de xaneiro.
