‘Baixo o mesmo paraugas’ é o lema que as entidades sociais do país levan artellando dende hai 9 anos polo Día Mundial da Discapacidade. Ese paraugas, símbolo de apoio, solidariedade e compromiso cunha sociedade máis inclusiva e igualitaria, serviu tamén para cubrir do orballo na concentración realizada esta mañá do 3 de decembro no paseo do Parrote, para conmemorar esta data solidaria.
Un evento para visibilizar e reivindicar os dereitos das persoas con discapacidade, na ademais de Aspace Coruña, unha das entidades convocantes, tamén participan xentes de Aspronaga, ENKI, Aspanaes, Artefíos, ACEM e Down Coruña, entre moitas outras.
A xornada, dirixida polos presentadores Fran Rei e Corina Alfonso, incluíu a lectura dun manifesto e a xa clásica interpretación da canción ‘Unha marea de xente’, que simbolizou a unión do público coa paraugada. Xa ao final da mañá, Poten100mos e Silvia Penide puxeron o peche cunha actuación musical.
Inés Rey, que puxo en valor a figura de Ricardo Iglesias, xerente de ASPACE, como un dos impulsores desta iniciativa, destacou a relevancia do tecido asociativo. “Se A Coruña está a vivir unha transformación de 180 graos nos seus espazos públicos é, principalmente, porque a loita das asociacións e as familias foi fundamental para colocar as persoas no centro das políticas públicas, facendo que a accesibilidade universal sexa unha prioridade esencial”.
