A Sociedade de Salvamento e Seguridade Marítima (Sasemar) contará cun almacén loxístico no porto exterior da Coruña, situado no municipio de Arteixo, que dará apoio ao Plan Marítimo Nacional e estará dotado con medios de loita contra a contaminación mariña e outros equipos que utiliza habitualmente a entidade adscrita ao Ministerio de Transportes e Mobilidade Sustentable. Segundo informa a Autoridade Portuaria, no marco do convenio de colaboración que mantén con Sasemar, iniciou o proceso para habilitar este almacén. Así, convocou un concurso público para a redacción do proxecto e o posterior control de execución da obra do edificio que albergará o almacén loxístico.

A licitación, engade, ten un valor de 200.000 euros. O proxecto deberá utilizar a tecnoloxía Building Information Modeling (BIM), ao entenderse que suporá unha mellora na visualización e xestión do mesmo, “facilitando a toma de decisións e o estudo de alternativas de deseño en canto á calidade das propostas, o estudo de custos e o procedemento construtivo, entre outras vantaxes”. En concreto, a Autoridade Portuaria prevé que a súa redacción poida concluír a mediados de 2025. A continuación, licitaranse as obras de construción do edificio, cunha duración que se estima inicialmente en 12 meses, segundo informa.