O deputado granadino do PP, Carlos Rojas, criticou “a actitude do executivo de Sánchez e o seu menosprezo aos granadinos“, porque “non recibiron unha explicación” despois da adxudicación da sede da Axencia Española de Supervisión da Intelixencia Artificial (Aesia) hai dous anos á cidade da Coruña. Unhas críticas que contrastan co apoio do presidente da Xunta, Alfonso Rueda, tamén do PP, á sede coruñesa.

“Ninguén dimitiu nin asumiu responsabilidades pola manipulación dos informes e os expedientes que levaron ao Goberno a arrebatar a sede a Granada nunha reunión que durou 20 minutos”, sinalou Rojas. Como declarou nunha nota de prensa remitida polo Partido Popular, “aínda non se coñece a verdade dunha decisión arbitraria e opaca que ninguneó á mellor candidatura sen máis xustificación que a política de favores do PSOE, incapaz de pór en marcha a Aesia na Coruña e habilitar unha sede”.

Rojas criticou “a postura dos socialistas granadinos ao longo deste proceso”. “É lamentable que a estas alturas non levantasen a voz ante o que foi unha traizón a Granada orquestrada desde A Moncloa“, lamentou. “O silencio do PSOE é unha mostra máis da crise que vive o partido e o afastados que están dos problemas dos cidadáns como se viu no congreso de Sevilla”, apostilou.