A alcaldesa da Coruña, Inés Rey, recibiu este xoves no Palacio Municipal de María Pita ao alcalde de Mariúpol, Vadym Boichenko, na súa visita a Galicia. O encontro, sinala o goberno local, “subliña a cooperación entre ambas as cidades e lembra o compromiso da Coruña con Ucraína”.

Na comitiva de Mariúpol participaron Vitaliy Falkovski, tenente de alcalde; Olha Pikula, asesora en Relacións Internacionais e Comunicación; Sergiy Zakharov, secretario de prensa; Alina Moskalenko, directora do Instituto de Vivenda do Consello Noruegués para os Refuxiados (NRC); e Diana Hradil, coordinadora de comunicacións do NRC.

Tamén estiveron presentes representantes da asociación AGA Ucraína, representada pola súa presidenta, María Pavlenko, e o vicepresidente, Óscar García Madarro.

A alcaldesa e o alcalde abordaron temas de interese común. Rey lembrou o apoio da cidade coa creación de OMAPU, a Oficina Municipal de Atención ao Pobo Ucraíno, posta en marcha polo goberno local en 2022 para apoiar ás persoas desprazadas pola guerra. “Foi unha medida pioneira recoñecida a nivel europeo que mostrou a solidariedade dos coruñeses”, apuntou.