O goberno local da Coruña aprobou, en Xunta de Goberno, a prórroga dos orzamentos para 2025 tras avanzar nas últimas datas o BNG que non apoiaría unhas novas contas por incumprirse, sostivo a formación nacionalista, acordos pactados para este ano.
A preguntas dos xornalistas, tras a rolda de prensa que ofreceu posterior á Xunta de Goberno, a rexedora, Inés Rey, ratificou a aprobación da prórroga para “ter orzamentos a 1 de xaneiro” ao non existir unhas novas contas. Así o expuxo tras informar da adxudicación da obra de reurbanización dos Cantóns, a fase cero da nova fachada marítima da cidade.
As actuacións executaranse no prazo de 20 meses, catro menos dos recollidos nos pregos, por unha UTE formada por Abeconsa e Canarga. As mesmas terán un custo de 7,4 millóns de euros, o que supón unha rebaixa próxima ao nove por cento con respecto ao orzamento de licitación.
Os traballos, indicou a alcaldesa, darán comezo nos primeiros meses do ano 2025 e permitirán a renovación integral dos Cantóns, entre o Obelisco e a praza de Mina. Por outra banda, nesta xornada deuse luz verde ao informe de viabilidade económica dos centros deportivos de San Diego e de O Castrillón, ao que se suma a piscina de San Amaro. O informe de viabilidade é o primeiro paso para a licitación conxunta dos tres recintos.
Máis novas
O BNG reprocha á alcaldesa da Coruña ter “descoidado o día a día” da actividade municipal
A alcaldesa da Coruña tras o “non” do BNG: “Haberá orzamentos, non descarto ningunha posibilidade””
