Aprobáronse esta mañá as liñas estratéxicas da reforma da Fachada Marítima do porto interior da Coruña. A Comisión Coruña Marítima daba luz verde a un Master Plan para afrontar un proxecto que levará décadas. Pero faciao coa abstención do BNG. O seu voceiro e edil Francisco Jorquera ve “luces e sombras” no documento das liñas estratéxicas, onde observa “contradicións no borrador do documento de bases estratéxicas”. Por iso principalmente abstivose alertando da “hipotética venda de activos portuarios para o pagamento dunha débeda que, do punto de vista do Bloque, debe ser condonada polo Estado, como a foi a de Valencia”.
As sombras
Para o BNG, “é decisivo que ao longo dese proceso se manteña a titularidade pública dos espazos portuarios, se dea unha solución á débeda – evitando que se salde mediante a venda de activos- e se asegure a participación social durante o desenvolvemento das distintas fases”.
En todo caso, Jorquera pon o acento en que “estamos no inicio dun proceso que será longo e terá por diante aínda moitas etapas”.
Para o BNG, os convenios de 2004 -que prevían a venda de activos para financiar Punta Langosteira- deben darse “definitivamente por superados” e a solución á débeda do porto pola construción da dársena exterior “debe pasar pola súa condonación ou unha solución equivalente, evitando que se pretendan resolver os problemas financeiros do porto a través da venda de activos”.
Jorquera argumenta tamén a súa posición ambigua ante mantén “reservas e cautelas” ante o carácter “restrinxido” do concurso internacional que se vai convocar para a redacción do proxecto, o que dificulta a participación de persoas expertas da nosa cidade ante a comisión do concello que el preside.
O documento contempla a hipótese de dotar a futura fronte marítima de novos equipamentos, singularmente dun espazo multiusos cuberto de grande capacidade. A ese respecto, Jorquera entende que, dada a situación en que se achan o Pazo da Ópera, Fórum e outras moitas instalacións culturais, o que se impón é “coidar o que se ten antes de pensar en novos recintos”.
As “luces”
Polo bando contrario, o BNG recoñece aspectos positivos pois no documento si se recollen “propostas históricas” do BNG, entre elas o aproveitamento da infraestrutura ferroviaria para implantar servizos de proximidade, abordando deste xeito as necesidades de transporte a escala metropolitana.
Destacou igualmente creación de infraestruturas verdes para corrixir a baixa ratio de zonas verdes por habitante que hai na Coruña, ben como tamén actuacións que nos preparen fronte ás alteracións climáticas e a elevación do nivel do mar ou á renaturalización da desembocadura do Río Monelos.
