A Deputación da Coruña e Pedralonga Estudos asinaron o contrato para a xestión do estudio virtual Coruña Estudio Inmersivo.

Coa firma deste documento, a sociedade será a encargada da xestión e explotación do centro de produción virtual VPxR, promovido pola Deputación no marco do proxecto ‘Ecosistema Dixital do Sector Audiovisual de Galicia – Coruña Estudo Inmersivo’.
O contrato será por un período de 20 anos prorrogables por outros 5 anos máis.

O Coruña de Estudio Inmersivo, o maior estudio de producción audiovisual virtual de España que entrará en funcionamento a principios de 2025, supón un investimento de preto de 9 millóns de euros, cofinanciados entre a Deputación e o Goberno de España a través do Plan de Recuperación, Transformación e Resiliencia, para dotar á Coruña dun plató virtual dotado da tecnoloxía máis innovadora, proporcionada por Telefónica.

O novo CEI “vai significar unha realidade audiovisual moi distinta en Galicia e en España”, sinlaou o presidente da Deputación Valentín González Formoso. “Ofertamos ao sector unha ferramenta única en España e que lle vai permitir competir a nivel global en todas as plataformas audiovisuais que operan no mercado”, apuntou antes de recoñecer a “complexidade” do proceso e agradecer a implicación “do persoal funcionario da Deputación e de todas as forzas políticas”, así como “o asesoramento do sector audiovisual a través do Clúster”. “Todo isto permitiu que esta realidade se poña en marcha e permita que o talento que xa agroma en Galicia tamén se comercialice, que se impulse dun xeito moi superior”, finalizou.

“Temos peticións de fóra porque é unha infraestrutura moi potente que tamén pode acoller publicidade, videoxogos… hai un rango de potenciais clientes moi grande e aspiramos a que tamén veñan rodaxes internacionais, claro”, especificou o presidente do Clúster Audiovisual Galego, que conforma Pedralonga Estudios, S.L. xunto coa Universidade da Coruña e Portocabo, Vaca Films, Tex45 Produccións, Voz Audiovisual, Congo Producciones, Zénit Televisión, Producciones Audiovisuales Sete Media, Undodez, Avendaño Estudio e Centro de Estudios Marcote.

O presidente da institución provincial, Valentín González Formoso, e os responsables de Pedralonga, Francisco De Borja Pena e Jesús Manuel López, foron os encargados de pór a firma a este contrato.