O Sindicato de Traballadoras e Traballadores do Ensino de Galiza (STEG) e familias de pacientes do Hospital de Día de Saúde Mental Infanto Xuvenil Teresa Herrera da Coruña reclaman un docente para o mesmo. Fano, segundo informan, tras presentar este luns por rexistro oficial senllos escritos “denunciando desatención” a unha vintena de mozas “que, pola súa situación, non poden asistir con regularidade ás aulas dos seus centros educativos”.
Nun comunicado, afirman que existía o compromiso de “estudar a situación e buscar unha solución para este alumnado especialmente vulnerable, maiormente de ESO e de Bacharelato”. A este caso, sen descartar posibles accións por parte das familias, suman o desta mesma área de saúde mental do Álvaro Cunqueiro de Vigo, agrupadas na Plataforma Adolece, que “seguen reclamando a estabilidade da figura docente” xa que afirman que a educadora asignada “é temporal”.
