O complexo hospitalario universitario da Coruña (CHUAC) alcanzou en 2024 a cifra de 309 transplantes de órganos, a cifra máis alta da historia do centro.

Así o informaron os seus responsables nunha comparecencia na que explicaron que se realizaron 157 transplantes de ril (17 de doante vivo); 64 de fígado; o mesmo número de pulmón; 30 de corazón e catro pancreáticos, aos que se suman cinco transplantes infantís e dez dobres.

En canto ao número de doantes, ascendeu a un total de 37, dos que 15 foron en asistolia controlada. A taxa de doazón da área sanitaria, con 67,5 doantes por millón de poboación, sitúase por encima da media estatal (52,6) e autonómica (50,7).

Supérase así, apuntaron, o obxectivo de 50 doantes por millón de poboación marcado pola Organización Nacional de Transplantes para o ano 2024, sendo España o país con maior taxa de doazón do mundo.

En canto ás negativas familiares, Galicia presenta unha porcentaxe do 19%, menor que a media española do 18,5%, mentres que no Chuac sitúanse no 15,90 por cento.