A Universidade da Coruña (UDC) suspenderá a súa actividade oficial na rede social X a partir do próximo sábado, 1 de febreiro, segundo informa o reitorado.

Farao tras o acordo adoptado este xoves no Consello de Goberno. “Unha medida adoptada en sintonía coa Conferencia de Reitores das Universidades Españolas e que reflicte o compromiso institucional de promover un espazo dixital respectuoso e inclusivo”.

A decisión foi tomada, explica, tras “unha análise exhaustiva, que tivo en conta tanto o impacto desta acción na comunicación institucional como o aumento significativo de discursos de odio, desinformación e polarización na devandita plataforma, comportamentos que contradín os valores fundamentais da UDC”.

A institución académica súmase así ao camiño que xa tomaron outras universidades e institucións, representantes gobernamentais, medios de comunicación e outros profesionais.