A música galega contemporánea segue tomando escenarios. Ese venres 7 de febreiro, co gallo da celebración do Día dos Medios en Galego, Leria e A Banda da Loba invadiron un feudo mítico na cidade da Coruña: o Playa Club. Unha das salas eternas da cidade acollía o festival organizado pola Asociación de Medios en Galego (o XornaldaCoruña é parte da familia AMEGA), co financiamento da Secretaría Xeral de Política Lingüística, para reivindicar o papel dos medios de comunicación no proceso de normalización lingüística.
Así o deixou claro a frontwoman de Leria, reivindicando maior apoio para os medios en galego tanto das administracións como da sociedade, antes de comezar a facer bailar a todo o Playa cos seus son frescos e guitarreiros, acompañados cunha base moi firme no baixo e na batería. Despois de triunfar no Festival #Aquítaménsefalagalego, as Andrea López, Helena Barreiro, Itziar de Blas, Candela Avendaño e Mayra darán moito que falar de aquí a moi pouco tempo.
En breve saltaron ao escenario as xa consagradas artistas da Banda da Loba. Andrea Porto, Estela Rodríguez, Inés Mirás, Marcela Porto e Xiana Lastra demostraron todo o seu potencial, e porque son unha das bandas referencia do panorama folk do país. Cunha marea de sons diversos e variados, e cun violín tan frenético como marabilloso, fixeron as delicias do público, e pecharon o concerto con todo un himno xa do país como o “Fabricando Luz”, o tema usado polo BNG na campaña das pasadas eleccións autonómicas.
