Un accidente provocado pola irrupción dun xabaril na calzada causou retencións á primeira hora da mañá na autoestrada AP-9, á altura de Cambre.
O accidente ocorreu sobre as 7,20 horas, á altura do quilómetro 12 da autoestrada, en sentido Santiago, cando un particular alertou ao 112 Galicia do atropelo dun xabaril, que causara unha colisión en cadea de catro vehículos.
Os efectivos de Bombeiros confirmaron que sete persoas necesitaron asistencia médica, pero ningunha presentaba lesións graves, e tampouco foi necesario utilizar medios de rescate para sacar aos feridos dos vehículos. Os feridos foron trasladados ao Complexo Hospitalario Universitario da Coruña.
Os servizos de Emerxencias mobilizaron a Urxencias Sanitarias de Galicia-061, bombeiros do parque comarcal de Betanzos, Protección Civil e Garda Civil de Tráfico.
