O Concello da Coruña promove programas de musicoterapia en centros para alumnos con necesidades especiais, segundo subliñou a alcaldesa, Inés Rey, nunha visita á CEE Nosa Señora de Lourdes de Aspronaga, xunto ao concelleiro de Educación, Juan Ignacio Borrego.

“Desde o Concello impulsamos este programa para apoiar ao alumnado coruñés con necesidades especiais co obxectivo de potenciar os seus capaciades individuais, reforzar a súa autoestima e promover o seu benestar emocional e social”, sinalou a rexedora.

O programa consiste no uso da música como proceso terapéutico, empregando elementos como o son, o ritmo, a melodía ou a harmonía para facilitar e promover a comunicación e a aprendizaxe, entre outros obxectivos. Na actualidade, leva a cabo este programa en tres centros de educación especial.

Noutra orde de cousas, o consistorio informou que xa está aberto o prazo de inscrición para as residencias literarias ‘Latitude 43’ e ‘Cidade da Coruña’. O primeiro é para escritores de todo o mundo e o segundo está dirixido a autores españois de fóra de Galicia. A bolsa cobre traslado, manutención e aloxamento para a persoa beneficiaria.