A alcaldesa da Coruña, Inés Rey, cualificou de “absolutamente vergoñento” que a portavoz nacional do BNG, Ana Pontón, sexa “incapaz” de condenar o “panfleto noxento” da CIG que caricaturiza á conselleira de Política Social, Fabiola García.

“Onde está o feminismo do BNG?, onde está a igualdade no nacionalismo galego? Non existe”, espetou este xoves a rexedora coruñesa do Partido Socialista en resposta ás preguntas dos medios durante un acto organizado pola Federación Galega de Municipios e Provincias sobre igualdade en Santiago. Na liña do que xa manifestou anteriormente, Rey mostrou o seu apoio a Fabiola García para, a continuación, censurar a “morneza” do BNG á hora de reaccionar ante o “panfleto” do sindicato nacionalista que caricaturizaba á conselleira nunha viñeta na que incluía un bocadillo no que dicía estar “moi cansa” por ir de compras ás rebaixas.

“A morneza neste tipo de asuntos é algo que me enerva especialmente. Podemos criticar a xestión da conselleira no ámbito das súas competencias, pero nunca polo feito de ser muller. Aí estarei sempre enfronte de quen faga este tipo de ataques. Mesmo se eses ataques viñesen dalgún cargo do meu partido, alzaría a voz igualmente”, remarcou a alcaldesa. “Creo que o feminismo ten que estar por enriba das siglas políticas e, por tanto, non entendo e non entenderei xamais que ante un ataque deste tipo existan partidos políticos que queden calados”, engadiu antes de insistir en que se trata de “un panfleto noxento” que “nunca” se faría dun conselleiro.