Tres persoas resultaron feridas de diversa consideración na tarde deste xoves nunha colisión entre dous coches ocorrida en Sada. Unha das condutoras tivo que ser excarcerada do vehículo.

Segundo informan os servizos de emerxencias, ocorreu na DP-5813 ao seu paso por Oseiro pasadas as 14.00 horas da tarde. Ao recibir a alerta, o 112 puxo en marcha o operativo con Urxencias Sanitarias-061, os bombeiros de Betanzos, a Garda Civil de Tráfico e o Servizo Municipal de Emerxencias de Sada.

Ao parecer, tal e como explica o Concello, o accidente orixinouse cando un dos vehículos realizou un xiro á esquerda para incorporarse á estrada que vai cara a Mosteirón e chocouse contra outro que facía unha manobra de adiantamento.

Nun dos coches accidentados, que quedou fóra da calzada e atravesando o cerco dunha leira, viaxaban dúas persoas, das cales una tivo que ser exarcelada e trasladada a un centro hospitalario.

No outro ían tres persoas e dúas delas requiriron asistencia médica. Os afectados foron trasladados aos hospitais San Rafael da Coruña e ao de Santiago.

O sinistro danou varios colectores e un poste telefónico, polo que se notificou a incidencia aos servizos de obras do Concello e a Telefónica.