A sección segunda da Audiencia Provincial da Coruña celebrará o mércores, día 5, un xuízo por agresión sexual a menor de 15 anos. Por estes feitos, un home enfróntase a unha pena de sete anos e nove meses de prisión que solicita para el Fiscalía como presunto autor dun delito de agresión sexual a menor. Tamén se lle piden tres meses de multa por un delito leve de furto á mesma vítima.

Os feitos sucederon o 21 de xullo de 2022 nun lugar público e o procesado deberá indemnizar á vítima con 11.000 euros por dano moral, con 165,55 euros polas feridas sufridas e polos efectos e diñeiro subtraídos: cinco euros e o custo da reposición das chaves de casa, cartón de bus e cartón bancario.

O Ministerio Fiscal pide, ademais, a prohibición de achegarse á vítima a menos de 700 metros, así como de comunicarse con ela por calquera medio de comunicación, ou medio informático ou telemático, contacto escrito, verbal ou visual, durante un período de 9 anos. A pena de prisión imposta, unha vez cumpra cinco anos, será substituída pola expulsión do territorio español e non poderá regresar a España nun prazo de oito anos.