A Coruña acollerá entre o 26 e o 29 de marzo o V Semana do Cinema Galego, na que se proxectarán no Teatro Colón oito cintas galegas de ficción e documental do último ano. As sesións son gratuítas.
Segundo explican nun comunicado, as proxeccións estarán acomapañadas por presentacións dos equipos das películas, que introducirán e conversarán co público sobre os seus traballos en todas as sesións do ciclo.
O certame botará a andar co documental ‘Salvaxe, Salvaxe’, de Emilio Fonseca, que se exhibirá o mércores 26 ás 19.30 horas, tras a inauguración oficial do ciclo. A obra rastrexa imaxes e ausencias do lobo ibérico.
Ese mesmo día tamén se proxectará ‘As Neves’, a obra de Sonia Méndez que conseguiu 13 candidaturas finalistas aos XXIII Premios Mestre Mateo. Un thriller que segue a un grupo de adolescentes nun pobo de montaña onde todos se coñecen.
O xoves ás 19.30 horas será a quenda de ‘Aurora’, un documental dirixido por Area Erina que segue a Aurora e Area, mulleres de mundos totalmente diferentes e con gran diferenza de idade entre elas, que establecen unha forte relación de intimidade, confianza e profundas conversacións ligadas á morte, a familia, a guerra e o papel da muller.
Na segunda sesión do xoves ás 21.30 horas proxectarase ‘Prefiro condenarme’, o documental dirixido por Margarita Ledo que conta a historia de mil caras de Sagrario, mariscadora na ría de Ferrol, que confronta cunha nai díscola, unha órbita familiar en perpetuo desasosego e un xuízo por adúltera aos 33 anos, en en 1972, por unha filla que ten co seu amante.
O venres 28 de marzo ás 20 horas será a quenda de ‘+ Cuñados’, a comedia de Luís Avilés protagonizada por Federico Pérez, Xosé A. Touriñán e Miguel de Lira que segue as novas aventuras dos cuñados máis famosos do audiovisual galego, esta vez, en Entroido.
Despois será a proxección de ‘Filmei paxaros voando’, un documental de Zeltia Outeiriño que, despois de 20 anos vivindo en Barcelona, volve a Galicia para filmar a memoria do seu tío Antonio, un artesán téxtil galeguista gai.
A última xornada da Semana do Cinema Galego arrincará o sábado coa proxección de ‘Honeymoon’ ás 20.00 horas. Dirixido por Enrique Otero e protagonizado por Javier Gutiérrez, Nathalie Poza e María Vázquez, é un dos títulos con máis candidaturas finalistas aos XXIII Premios Mestre Mateo.
Ás 22.00 horas pecharase o certame coa proxección do thriller ‘Xustiza artificial’, de Simón Casal. A película relata un escenario no que o goberno español anuncia un referendo para aprobar un sistema de Intelixencia Artificial na Administración de Xustiza que promete automatizar e despolitizar a xustiza substituíndo, na práctica, a xuíces e xuízas en todos os tribunais do país.
