- Xa poden entrar e opinar en www.corunamaritima.com.
- Poden descargar aquí as Bases Estratéxicas do Proxecto Coruña Marítima.
— —
O desenvolvemento do proxecto ‘Coruña Marítima’, para o futuro deseño da zona dos peiraos, inicia unha nova fase coa distribución aos colectivos, entidades e institucións da cidade das bases estratéxicas que foron acordadas de cara á licitación do plan que definirá o futuro dos espazos do porto interior.
Así o informaron a Autoridade Portuaria e o Concello da Coruña, que precisaron que as bases foron remitidas a máis de 800 entidades. Entre os destinatarios figuran asociacións sociais e culturais, colexios profesionais, empresas portuarias, Universidade, institucións públicas, colectivos empresariais, grupos ecoloxistas ou fundacións.
No escrito acompáñase unha carta da Comisión Coruña Marítima, na que se resume a situación actual do proxecto e concédese o prazo dun mes para a presentación de suxestións ou achegas que serán valoradas de face á súa posible inclusión no documento definitivo.
Así mesmo, o documento inicial destas bases estará dispoñible para todos os interesados a partir de mañá na web www.corunamaritima.com. Esta páxina recollerá as noticias sobre o proxecto e os documentos máis relevantes (na pestana de Gobernanza) e contará cunha caixa de correos de suxestións aberto a todos os cidadáns.
As bases estratéxicas foron aprobadas o pasado 24 de xaneiro na reunión da Comisión Coruña Marítima, coas dúbidas da oposición e as crúas queixas das plataformas cidadás, na que están representadas as seis administracións que forman parte do proxecto, ademais do tres grupos políticos municipais.
As seis administracións son o Concello da Coruña, a Xunta de Galicia, o Ministerio de Transportes e Mobilidade Sustentable, a entidade pública empresarial Administrador de Infraestruturas Ferroviarias (ADIF), o organismo público Portos do Estado e a Autoridade Portuaria da Coruña.
Máis novas
“Co Master Plan Coruña Marítima enfróntamos a unhas propostas anacrónicas”
As “luces e sombras” do Master Plan da reforma da fachada marítima que explican a abstención do BNG
