Un incendio na cociña dun piso da Coruña, situado na Avenida de Hércules, obrigou a trasladar ao hospital da cidade a dúas persoas. Unha delas sufriu queimaduras, mentres que a outra inhalou fume, segundo informa o servizo de emerxencias.

Na primeira alerta que recibiu o 112 Galicia esta tarde, o particular manifestou que había unha persoa afectada e que estaba a arder a cociña do piso.

Tras o primeiro aviso, o 061, os Bombeiros, a Policía Nacional e a Local desprazáronse ata o foco do incendio.

O lume foi apagado antes da chegada dos bombeiros, quen indicaron que ardera a campá extractora. A pesar diso, as dúas persoas afectadas foron trasladadas ao hospital.