Mariscadores e mariscadoras da ría do Burgo secundaron este luns unha nova concentración ante a Delegación do Goberno para esixir ao Executivo central e á Xunta axudas mentres non poidan faenar tras as obras de dragado, mestres esperan que o marisco medra.
“Non temos aínda ningún tipo de resposta por parte da Administración estatal nin autonómica”, denunciou o portavoz do colectivo, Manuel Baldomir, ao trasladar a situación na que se atopan, segundo precisou, “preto de 70 familias”. “E por desgraza, sen visos de ver unha resposta pronta”, advertiu.
Neste sentido, recalcou que “non se comprende como a clase política que ten que estar para gobernar e solucionar os problemas estea a agachar a cabeza”. “É lamentable”, insistiu.
“Estamos nunha situación moi precaria tanto economicamente como psicoloxicamente”, resumiu para esixir a ambas as administracións “que dean unha solución”.
