Policías nacionais e gardas civís secundaron unha protesta ante a Delegación do Goberno en Galicia no marco dunha mobilización a nivel estatal e en rexeitamento á cesión de competencias a Cataluña en materia de migración. Tamén para reclamar “mesmo traballo e mesma xubilación” que outros corpos policiais.
Fixérono unha trintena de persoas ante a sede deste organismo na Coruña, coa lectura dun manifesto e con pancartas nas que se podía ler ‘Pola seguridade de todos, non á cesión de competencias’, ‘Somos os peor retribuídos‘, ‘Mesmo traballo, mesma xubilación’ ou ‘Sánchez véndenos, Marlaska escóndese’.
Trátase dunha convocatoria promovida pola Plataforma por unha Xubilación Digna e a plena Equiparación para rexeitar o acordo con Cataluña ao entender que “vai en contra da Constitución”. E é que para os convocantes “un corpo policial autonómico non pode nin debe arrogarse as funcións asignadas ás Forzas e Corpos de Seguridade do Estado”.
“É escenificar publicamente o malestar de policías nacionais e gardas civís, non somos cromos para conseguir os apoios lexislativos necesarios do Goberno”, sentenciou o secretario xeral do Sindicato Unificado de Policía en Galicia, Roberto González. “Compromete a seguridade nacional e levanta un muro con Cataluña nunha materia moi sensible“, apostilou para asegurar que suporá “criterios diferentes” nesta comunidade autónoma á hora de conceder permisos de estranxeiría.
