A décima edición do Galicia Fórum Gastronómico abriu este domingo as súas portas na cidade da Coruña, nun acto institucional no que participaron representantes de diferentes administracións, entre eles o presidente da Xunta, Alfonso Rueda; o conselleiro do Mar, Alfonso Villares; o presidente da Deputación da Coruña, Valentín González Formoso; e a alcaldesa da cidade, Inés Rey.
O evento, que se celebrará durante tres días no recinto feiral ExpoCoruña, conta con máis de 200 expositores e prevé superar os 25.000 asistentes. Entre os participantes, destacan 27 cociñeiros galardoados con estrelas Michelin, que ofrecerán demostracións e actividades ao redor da cociña de vangarda e do produto local.
Durante a inauguración, Villares puxo en valor a cociña galega, definíndoa como “unha das maiores fortalezas” e “un sinal de identidade da comunidade”, e destacou o papel da cadea mar-industria e da distribución como parte esencial no desenvolvemento económico e territorial de Galicia.
A Xunta recordou que Galicia conta actualmente con 17 estrelas Michelin, tres delas dobres, así como 36 selos de calidade diferenciada, situándose como a terceira comunidade con máis distincións deste tipo. Tamén suma 43 Soles Repsol e 20 Bib Gourmand, entre outros recoñecementos.
Pola súa banda, González Formoso salientou a importancia de feiras como esta para impulsar o turismo gastronómico na provincia, mentres que Rey agradeceu o esforzo conxunto de produtores, profesionais da hostalaría e administracións por facer posible un evento que, segundo dixo, “reflicte o mellor da nosa terra e o talento da nosa xente”.
O Galicia Fórum Gastronómico converterase durante estes días nun escaparate da creatividade culinaria galega, cun programa que inclúe obradoiros, catas e espazos de innovación que buscan reforzar o posicionamento da gastronomía como motor estratéxico para Galicia.
O Cociñeiro Galego do Ano
Unha das citas máis esperadas era o premio Cociñeiro Galego do Ano, que foi para Víctor Basante, do Restaurante Arrueiro de Laxe, co seu prato Pescada, manteiga de chourizo e pil pil da súa cabeza. Un premio para poñer en valor gran talento emerxente que existe, como demostraron tamén os finalistas a Arón Álvarez, de Os Maristas; Bret Fernández, de Prebe; Nel Parada, de Nordestada, e Miguel Vázquez, de Atípico, nun dos momentos máis emocionantes da xornada, que incluíu un escaparate da gastronomía que chega á Coruña con nomes como Nacho Moreira, Chechu Rey, ou Manuel Triay.
