A Policía Nacional e a Policía Local da Coruña despregaron un amplo dispositivo de control e prevención en locais de lecer nocturno esta pasada fin de semana, que se saldou con máis dun centenar de persoas identificadas e 16 actas de sanción por diversas infraccións.
É o segundo operativo destas características xa que o pasado mes de febreiro os corpos policiais levaron a cabo un dispositivo similar en varios locais, e aseguran que manteñen “vixilancia e prevención, de forma reiterada e case a diario”.

O operativo tivo lugar na noite do 22 ao 23 de marzo nas zonas do Orzán, Ventorrillo e Conchiñas, considerando os corpos policiais que algúns dos locais destas zonas son orixe de “numerosos conflitos” como “pelexas, berros, comportamentos incívicos”, aos que se suman incumprimentos da normativa municipal referida a horarios e aforamentos.

No operativo da fin de semana participaron efectivos de Policía Local e de diferentes áreas da Policía Nacional (Seguridade Cidadá, Estranxeiría e Policía Xudicial).

Como resultados, nos varios locais inspeccionados identificouse a máis de cen persoas e confeccionáronse 8 actas por tenencia de estupefacientes, 3 actas por tenencia de armas prohibidas na vía pública, e 5 actas (expedidas pola Policía Local) por diversas infraccións da normativa municipal nos devanditos establecementos.