Un home acusado de dous delitos de tentativa de asasinato nun bar da Coruña –á súa exparella e ao noivo desta– recoñeceu agredir ao home pero non con intención de matalo. “Queríalle marcar a cara, soamente”, alegou. Foi na vista que se celebrou na sección primeira da Audiencia coruñesa na que tamén se lle xulga por quebrantamento de condena ao ter en vigor unha orde de afastamento da muller. Todo iso en relación a uns feitos que se produciron nun bar situado na avenida dos Mallos, o 24 de decembro de 2023, segundo consta no escrito do Ministerio Fiscal.
O procesado explicou que sentiu celos ao ver á exparella e sostivo que o home o “estaba provocando”. “Eu estaba ebrio, quente polo alcol”, argumentou para apuntar que se dirixiu “directamente” cara o home cun coitelo que atopara fóra do local “na beirarrúa”. “A miña intención era facerlle dano”, asegurou para recalcar que non quería matalo “para nada”. “Soltei o coitelo porque o vin sangrar e xa non quixen seguir”, apostilou. Pola súa banda, o home agredido declarou no xuízo que notou “unha picada” e iniciou unha “pelexa” co procesado durante a cal recibiu “tres cortes co coitelo”. “Non o vin vir”, concretou tras explicar que o procesado estaba “tomado” no momento dos feitos. Na mesma liña, a muller insistiu en que o acusado estaba “moi bebido”. “Vino moi mal, non sei que máis tiña a parte de alcol”, aseverou.
PETICIÓN DE CONDENA
O Ministerio Público pide para o procesado polo delito de asasinato en grao de tentativa, en concurso con outro, ao tratarse de dúas vítimas, trece anos de prisión, así como un ano de cárcere por quebrantamento de condena, única pena que solicita a acusación particular que representa á muller. A defensa, en contraposición, alega que “non houbo intención de ocasionar ningún tipo de morte” e recoñece que existen “unhas lesións con instrumento perigoso”. “Non había afán de matar a ninguén e moito menos á que fora a súa exparella, quen non ten lesión ningunha”, expuxo o letrado en declaracións aos medios. Así, pide a atenuante de “alcoholismo crónico” e reclama para o seu cliente un delito de lesións con instrumento perigoso. “De dous a cinco anos de cárcere”, especificou.
