A Asociación de Vivendas Turísticas de Galicia (Aviturga) trasladou a súa “preocupación” pola nova ordenanza municipal que regulará na Coruña o uso das mesmas ao entender que xerará “inseguridade xurídica”. Segundo informa, tanto a asociación como propietarios afectados presentaron alegacións durante o período de información pública, que concluíu o pasado venres.
Esta entidade sostén que a ordenanza “contén graves vicios de nulidade ao invadir competencias que non son propias do consistorio”. “O Concello atribúese competencias estatais en materia de propiedade horizontal e tenta innovar na ordenación de actividades turísticas, cuxa regulación corresponde exclusivamente á Xunta de Galicia”, sinalan.
Así mesmo, denuncian que a normativa “reproduce literalmente parágrafos enteiros doutras disposicións de rango superior, vulnerando o principio de xerarquía normativa”. “Un dos aspectos máis preocupantes para os propietarios é que a nova regulación ignora por completo os dereitos adquiridos de quen contan con rexistro turístico oficial desde 2017 e cumpren escrupulosamente con todas as normativas vixentes, tanto estatais (Axencia Tributaria e Ministerio do Interior) como autonómicas”, sostén, entre outros argumentos.
