Representantes da CIG secundaron senllas concentracións este martes, na Coruña, para denunciar a “política de deslocalizacións” no sector dos centros de chamadas e reivindicar o mantenimeitno dos postos de traballo en Galicia.

A primeira protesta realizouse ante as oficinas de Atento “en rexeitamento á decisión da empresa de pechar o servizo de atención de avarías na quenda de noite e trasladalo a Colombia”.

A segunda mobilización fíxose diante da tenda que Movistar ten na praza de Pontevedra para responsabilizar á operadora de telecomunicacións da decisión.

“É cómplice da deslocalización do seu propio servizo por parte de Atento e de provocar a perda de actividade e de postos de traballo”, denuncia o secretario comarcal de CIG-Banca, Sergio Toucedo.