As traballadoras das residencias privadas de maiores intensificaron este martes as protestas na Coruña antes da folga convocada para os días 10 e 22 de abril.

Un grupo de delegadas e representantes da CIG-Servizos ocupou este mediodía a entrada ao Edificio Amizar da Coruña para reclamar a intervención da Consellería de Política Social no conflito e tentar desbloquear a negociación do convenio.

Durante a ocupación denunciaron ante a directora territorial “os incumprimentos das empresas, a sobrecarga de traballo, a precariedade laboral e salarial e as carencias na asistencia que se presta ás persoas usuarias”.

Ademais, a CIG lembrou nunha nota de prensa que ten solicitada desde o pasado mes de setembro unha reunión coa conselleira de Política Social, Fabiola García, “que a día de hoxe segue sen responder e non demostrou ningún interese por coñecer as demandas das traballadoras”.

Neste sentido, o secretario de Negociación Colectiva da CIG-Servizos, Adolfo Naya, manifestou o malestar entre as traballadoras por outros problemas derivados, como a decisión da Xunta de ingresar persoas con doenzas psiquiátricas nas residencias de maiores, sen contar con centros acondicionados nin persoal cualificado.

Con todo, o sindicato asegurou que a directora territorial “tomou nota das demandas con intención de trasladalas á máxima responsable da Consellería”. Pola súa banda, a CIG ten convocada folga nas residencias privadas de maiores e centros de día para os días 10 e 22 abril e 7 e 21 de maio “en resposta á parálise na negociación colectiva por parte da patronal”.