Alternativa dos Veciños propuxo constituír unha comisión xestora en Cambre ante a dimisión da alcaldesa, María Pan, para garantir, segundo expuxo, a xestión no goberno ao non contar co necesario apoio da oposición ao non dispor da maioría.

“Coa representación de todos os grupos políticos pactaría a resolución dos asuntos de maior calado para que o Concello volva funcionar“, sinala sobre a comisión xestora.

Nun comunicado, asegura que “se no pleno de investidura á Alcaldía de Cambre ningún candidato ou candidata lograse a maioría necesaria”, Alternativa dos Veciños propón crear a comisión xestora ata as próximas eleccións. Ademais, afirma ter “a man tendida para formalizar calquera pacto que beneficie á cidadanía de Cambre pois calquera outra solución cun goberno en clara minoría sería profundar máis nos problemas actuais”.