Delegadas e delegados da CIG da Construción retomaron este martes as mobilizacións en demanda da negociación dun convenio galego no sector. Faino, sinala a central sindical, co obxectivo de “seguir avanzando en dereitos e que blinde as melloras pactadas nos convenios provinciais fronte ao estatal”.

Despois das protestas en Santiago de Compostela, Ourense e Vigo, nesta ocasión a CIG levou as súas reivindicacións ante a sede da patronal da Coruña, Apecco. Non descarta, por outra banda, a posibilidade de ir a unha folga sectorial “se o empresariado continúa ignorando as demandas do persoal”. A central nacionalista, tras a aprobación do cambio lexislativo que dá prioridade aos convenios e acordos interprofesionais autonómicos, instou á patronal da construción a iniciar a negociación dun acordo ou convenio galego.