María del Carmen Seijas, veciña da Coruña, recibiu o recoñecemento como Republicana de Honra 2025, impulsada pola Comisión pola Recuperación da Memoria Histórica (CRMH).

A alcaldesa da Coruña, Inés Rey, presidiu este mércores, no Palacio Municipal de María Pita, o acto institucional de recoñecemento á homenaxeada, que este venres cumpre 100 anos.

“A historia dos Seijas é a historia dun barrio que soubo manter a cabeza alta mesmo nos momentos máis escuros”, apuntou Inés Rey, nun acto con presenza tamén do presidente da CRMH da Coruña, Carlos Babío; a subdelegada do Goberno, María Rivas, representantes da corporación municipal e entidades veciñais, entre outros.

A homenaxeada foi recoñecida como símbolo da loita pola liberdade, da resistencia á ditadura e da dignidade popular. “Irmá pequena dunha familia de oito aprendeu, non só a compartir, senón a entender a vida non como algo individual senón como un camiño colectivo”, apuntou.