Non avanza o Concello de Cambre, nin sequera trala segunda dimisión na alcaldía, que se confirmará no pleno ordinario deste venres, cando María Pan Lesta deixará de ser alcaldesa.
Este mércores 9 de abril celebrábase un pleno extraordinario importante, que aproveitaron os traballadores municipais para volver concentrarse ás portas e intentar facerse oír ante o ruído político que apaga todas as demandas laborais.
Co lema “non queremos que nos usen” deixaron claro que non queren formar partido de ningún bando e que o único que queren é sentarse a negociar para acordar a recuperación de condicións e melloras cos traballadores, “que somos a forza de traballo desta entidade”, lembran.
Mentres, no Salón de Plenos dábase conta da parálise municipal que sofre o Concello. O voto en contra de PP, PSOE e BNG impide aprobar os orzamentos de 2025 e a nova RPT de Cambre. A aínda alcaldesa, María Pan Lesta (Unión x Cambre), propuxo a aprobación de dous asuntos “esenciais” para Cambre: os orzamentos de 2025 e a nova Relación do Posto de Traballo, unha proposta que contou co apoio sindical pero que contou con informes contrarios dos representantes nacionais da Secretaría, a Intervención e a Xefatura de Urbanismo, a Intervención e a Xefatura de Urbanismo. Ambos puntos foron rexeitados polos 11 concelleiros do PP, do PSOE e do BNG.
No caso da RPT, o punto xa nin se debateu tras rexeitar a urxencia cos votos a favor de Unión x Cambre, Alternativa dos Veciños e a concelleira non adscrita e os votos en contra de PP, PSOE e BNG.
O concelleiro de Economía, Facenda, Innovación Tecnolóxica e Seguridade da Cidade, Daniel Mallo, lembrou que levan meses traballando nas contas, e que “se realizaron reunións onde todos os grupos corporativos tiveron a oportunidade de aportar as súas propostas”. Estes encontros concluían cun orzamento de 20.885.058,19 euros “axustado á realidade e con partidas que inclúen unha modificación da RPT, unha posible carreira profesional, créditos a licitar para servizos precarios e investimentos en todas as parroquias”. Pero finalmente Cambre seguirá sen orzamento polos votos en contra de PP, PSOE e BNG, unha decisión que Mallo califica “como un voto de castigo que deixou claro que os dous proxectos e obras recollidas no documento non se podían levar a cabo”.
Pola súa parte, dende a oposición, o PSOE entende que o goberno non cumpríu “a única proposta que presentou o partido socialista en 2025: licitar os contratos de todos os servizos básicos”. Á súa vez, o PP argumentou o seu voto en contro na “falta de consenso e de diálogo” do goberno.
Novas relacionadas
A alcaldesa de Cambre explica a súa dimisión polo “boicot de PP, PSOE e BNG”
O PSOE de Cambre sinala que a alcaldesa non asumiu “erros” e actuou de forma “partidista”
O BNG tilda de “crónica dunha morte anunciada” a dimisión da alcaldesa de Cambre
