A alcaldesa da Coruña, Inés Rey, considerou que o PP está “fóra da realidade” ao criticar que as alegacións aos orzamentos deste ano, que foron desestimadas en Xunta de Goberno, non levasen a pleno.

“Os orzamentos foron debatidos no pleno e tiveron a oportunidade de propor e trasladar a súa posición e propostas non nos chegou ningunha”, replicou a rexedora socialista, quen asegurou que tanto PP como BNG tiveron a oportunidade de presentar unha moción de censura o que non fixeron tras someterse ela a unha cuestión de confianza vinculada ás contas.

“Agora mesmo o que toca é non entorpecer, non dilatar máis este asunto”, dixo para incidir na necesidade de que poidan executarse canto antes as partidas previstas para este ano.

Por outra banda, sobre os foros temáticos organizados para o deseño da fachada marítima coruñesa destacou e agradeceu a participación existente con distintos encontros e avanzou que haberá un foro, a modo de peche, o 25 de abril.

“Estamos a traballar nese protocolo ‘Coruña Marítima, que se asinou de acordo con todas as administracións e agora si dando pasos reais e certos á hora de afrontar a gran transformación da Coruña”, sentenciou.