A Comisión pola Recuperación da Memoria Histórica da Coruña (CRMH) esixiu ao Concello da Coruña a convocatoria “inmediata” do Consello Municipal de Memoria Democrática e a inclusión da sociedade civil nas políticas a este respecto.
Faino tras solicitude do consistorio ao Ministerio de Política Territorial e Memoria Democrática de que a Casa Cornide, a contorna da Torre de Hércules e Casa Museo Casares Quiroga sexan declarados como Lugar de Memoria Democrática.
En comunicado, a CRMH considera “insólito” e “inaceptable o incumprimento sistemático” por parte do goberno municipal do seu “compromiso” para convocar este organismo consultivo, de participación e de recuperación da memoria das vítimas do franquismo e de atención e apoio aos seus descendentes directos.
Denuncia, ademais, a “falta da máis mínima transparencia” do Concello coruñés sobre estes asuntos e recalca que “sen sociedade civil nin movemento memorialístico non pode haber avances efectivos nas políticas públicas de memoria”. No entanto, valora “positivamente” que se amplíen as solicitudes deste tipo de declaracións de zonas do municipio.
