O Parque Eólico de Carboeiro, promovido por Green Capital Development, pretendía instalar 8 aeroxeneradores de 4,5 MW de potencia unitaria e de case 250 metros de altura (como a Torre Foster, un dos 4 rañaceos de Madrid, que pasa por ser o edificio máis alto de España con 49 plantas).
Pero o proxecto atopouse de contado coa oposición da cidadanía e mesmo dos propios Concellos da Laracha e Arteixo, que uniron forzas para presentar alegacións conxuntas ata o punto de que a Xunta suspendía cautelarmente o proxecto.
Un proxecto que vén de recibir outro revés, neste caso do Tribunal Superior de Xustiza de Galicia (TSXG) que vén de suspender a autorización previa e de construción outorgada pola Xunta para o devandito parque. Faino despois do recurso da Asociación Petón do Lobo.
O máis salientable, é que o TSXG argumenta a súa decisión nunha recente paralización por parte do Tribunal Supremo –do 2 de abril de 2025– do parque eólico Moeche, nese caso de tramitación estatal por ser de máis de 50 megawatts, o cal se baseaba na falta de análise do impacto dunha “alta concentración de parques eólicos”. Cabe interpor recurso de reposición.
Ademais, o auto recoñece a afectación a diferentes s recursos patrimoniais e naturais que se atopan na contorna que poderían afecta o éolico. Entre outros, refírese a que a menos de 50 metros está o xacemento arqueolóxico Mámoa do Carboeiro ou da Pedra da Auga, ademais de atoparse a uns 60 metros do Castro de Santa Localia e a menos de 300 metros do xacemento Pedrafita dous Montes de Santa Leocadia/Pedra dous Rizos.
Tamén se remarca que se localiza nunha “zona de máxima sensibilidade ambiental”, non recomendada para a instalación de enerxía eólica, segundo a zonificación ambiental do Ministerio para a Transición Ecolóxica. E apúntase que “afecta de forma severa e irreversible á paisaxe, aos núcleos de poboación, ás vivendas de familias, descontextualizando o patrimonio cultural”.
PRETO DE 70 PARALIZACIÓNS
O alto tribunal galego emitiu un total de 169 autos relativos a peticións de suspensións cautelares de autorizacións de 71 parques, das cales estimou 67 e desestimou 4.
