Fiscalía pide 14 anos de cárcere para o acusado de matar a puñaladas a Yoel Quispe, de 22 anos, que faleceu na Coruña na Noiteboa de 2023 durante unha liorta.

Este venres coñeceuse o escrito de acusación do Ministerio público, que ve responsable dun delito de homicidio ao principal investigado, que está en prisión provisional desde poucos días despois dos feitos.

Segundo o fiscal, todo ocorreu sobre as 06.30 horas na confluencia das rúas Juan Flórez e Sinfónica de Galicia, onde o procesado viu a varios individuos agredíndose mutuamente, polo que se achegou para pór paz entre eles.

“Por motivos non aclarados, a actitude inicialmente conciliadora do acusado deu paso a outra agresiva contra Yoel e, de feito, un e outro se empezaron a golpear mutuamente con empuxóns, patadas e puñadas”, explica Fiscalía.

Así, nun momento dado, o acusado habería ido a xunto un amigo a coller unha navalla (sen que estea acreditado se este segundo home animouno ou non a utilizala contra Yoel).

A partir de aí, abriu a folla desta arma branca e atacou á vítima realizándolle varios cortes na clavícula e no coiro cabeludo, para logo apuñalalo no corazón e no abdome.

O procesado foi detido o 28 de decembro de 2023 e enviado a prisión provisional desde entón.