O Concello da Coruña abre este sábado, día 3, o prazo para optar á primeira Residencia de Conciliación para nais escritoras. O programa ofrecerá en agosto unha bolsa que cobre viaxe, estancia e un servizo municipal de coidado do menor, dirixida a autoras con fillos ou fillas nacidos entre 2013 e 2021.
Así o anunciaron os responsables desta iniciativa pioneira impulsada polas concellarías de Benestar Social, Igualdade e Participación e de Cultura, en colaboración coa Residencia Literaria 1863, durante a presentación da mesma. Para a titular de Igualdade, Nereida Canosa, “ser nai e ser escritora non poden seguir sendo camiños incompatibles” e con esta axuda garántese “tempo creativo e apoio real aos coidados”.
Así mesmo, o concelleiro de Cultura, Gonzalo Castro, considera que este proxecto “reforza o compromiso da cidade cunha cultura accesible e transformadora”. Pola súa banda, a poeta Yolanda Castaño, directora do centro Residencia Literaria 1863, cualificouno como “un faro para que a palabra feminina floreza con plenitude”.
A convocatoria, segundo informa o consistorio, permite presentar solicitudes desde as 09.00 horas deste sábado, día 3, ata as 22.00 do 31 de maio. Poderán concorrer escritoras maiores de 18 anos con, cando menos, dous libros publicados e que sexan coidadoras principais dun menor nado entre o 1 de xaneiro de 2013 e o 31 de decembro de 2021.
