Os membros do comité e a representación da CIG que permanecían desde ao nove e media da mañá nas oficinas da UTE Acceso Porto Exterior A Coruña acordaron levantar o peche sobre as 18.00 horas, informa a central sindical.

Fixérono, explica, “despois de conseguir o compromiso de que se apartará de maneira cautelar ao encargado da subcontrata”, responsable do que a CIG considera “unha agresión racista nas obras” e que se abrirá, engade, “unha mesa de negociación con responsables de Sacyr para abordar o resto de problemáticas denunciadas”.

Ao longo de todo o día fóronse producindo contactos coa dirección da UTE (formada por SACYR Construción, CAVOSA, Taboada e Ramos). Finalmente, tras case nove horas de peche, acordábase abandonar as oficinas da UTE.

Ademais dos compromisos adquiridos, fixouse unha reunión para o vindeiro luns na que participarán responsables da empresa “co obxectivo de abrir unha mesa de negociación” para tratar demandas sindicais.