O Espazo Avenida acolle este venres a presentación á cidadanía das conclusións do proceso participativo do proxecto ‘Coruña Marítima’, así como a situación actual do proxecto, para o deseño da fachada portuaria e dos peiraos interiores.

Así o informan desde o Concello da Coruña e a Autoridade Portuaria en relación a unha cita que comezará ás 09.30 horas e que será con entrada libre ata completar o aforamento.

Ademais dos representantes do Concello, Xunta de Galicia, Goberno central e Autoridade Portuaria, contará coa intervención da directora corporativa de Portos do Estado, Pilar Parra; a presidenta da Asociación Internacional para a Colaboración entre Portos e Cidades (RETE), Teófila Martínez; e o director de Port Vell, David Piñeiro.

En concreto, a inauguración institucional deste evento contará coas intervencións de Inés Rei, alcaldesa da Coruña; Diego Calvo, conselleiro de Presidencia, Xustiza e Deportes; María Rivas, subdelegada do Goberno na Coruña, e Martín Fernández Prado, presidente da Autoridade Portuaria da Coruña.

Posteriormente, o director da Autoridade Portuaria, Juan Diego Pérez Freire, exporá os resultados máis relevantes do proceso participativo e os próximos pasos que están previstos para avanzar no proxecto. A continuación celebrarase unha mesa sobre as intervencións en espazos portuarios.

REFORMA NO MONUMENTO A MARÍA PITA

O Concello da Coruña iniciou unha intervención integral sobre o monumento a María Pita, situado na praza dedicado á heroína coruñesa.

Trátase dunha actuación que responde, informa o goberno local, ao “compromiso coa conservación do patrimonio da cidade e a súa posta en valor como símbolo colectivo da memoria e da identidade coruñesa”.

O elemento central da reforma consiste na instalación dunha nova patena de bronce conmemorativa, “única e orixinal, deseñada para permitir o uso cerimonial do pebetero”.

Esta será sobre o quemador existente e incorporarase cun sistema de ancoraxe e fixación deseñado para garantir a súa estabilidade e duración.