A alcaldesa da Coruña, Inés Rey, reivindicou o proxecto para o deseño da fachada marítima coruñesa como un “modelo de cooperación para avanzar cara a unha cidade máis aberta, innovadora e sustentable”.

Foi no marco do 25 aniversario da Rede de Cidades Atlánticas, en Xixón, cidade que acolleu á asemblea xeral e que reuniu a representantes de diferentes cidades europeas.

A rexedora, que preside a rede desde setembro de 2024, liderou o cume que reuniu a representantes de San Sebastián, Faro, Bilbao, Santander, Viana do Castelo e Brest.

Foi co obxectivo de compartir políticas locais para protexer o litoral e impulsar novas formas de desenvolvemento sustentable. Durante o encontro subscribiuse a Declaración de Xixón 2025, un documento estratéxico sobre o compromiso conxunto co futuro do espazo atlántico europeo.

“A declaración aposta por transfomrar as cidades desde o mar, promovendo a economía azul, a resiliencia climática, a planificación urbana sustentable, a igualdade e a cohesión territorial”, sinalou Inés Rey.